Konpainia

Zo-Zongó!! konpainia 2004an sortu zen, kaleko perkusio-talde bat osatu genuenean. Garai hartan 300 emanaldi eman genituen Euskal Herriko zenbait tokitan. Gaur egun, Astigarragan (Gipuzkoan) dugu konpainiaren egoitza soziala. Gure jakin-min artistikoak lanbide bihurtu nahian, kooperatiba bat osatzea erabaki genuen, 2013an. Tokiko musikari ospetsuak ere kooperatiban sartu ziren. Gaur egun, zortzi kaleko eta antzoki barruko ikuskizun ditugu, eta geuk produzitzen ditugu.

Guztira, 40 artista inguruk lan egiten dute ikuskizunetan, eta horrek, gainera, aukera ugari ematen digu neurrirako ikuskizunak sortzeko ere.

Geure konpainia musikariok eta musikarientzat egina da, eta baliabide bat da sormen- zein banaketa-lana egiteko lekua eta laguntza edukitzeko. Horrekin batera, altak emateko eta fakturak egiteko zerbitzua ere eskaintzen dugu, hori baita artistek gaur egun topatzen duten arazorik handienetako bat, kontratuak egiterakoan.

Berrikuntza pedagogikoari dagokionez, prestakuntza-eskolak eta maisu-eskolak antolatzen ditugu, nazioko eta nazioarteko musikarien eta dantzarien eskutik. Interesa izanez gero, edonork eman dezake izena ikastaroetan. Horrez gain, haurren zein helduen garapen pertsonala, gorputzaren garapena edota garapen sentsoriala lantzeko lantegiak eta eskolak ere antolatzen ditugu.

Taldea

Ander García

Produkzioa eta banaketa

Gautxori ospetsua, sareetako ibiltaria, Marijaiaren espirituak hartuta, eta friki samarra astialdian… Interneten egin duen lorpenik handiena orratz bat lastategi batean aurkitu izana izan da… Bere lagunen laguna da, eta kontu handiz ibili beharko duzu, berak duen guztia zuri ez emateko…

Iker Santos

Administrazioa

Malabarista trebea da zifrekin, lanaldi partzialeko agoniazalea, abeslari frustratua eta Lan eta Ogasun Ministerioko laguntzaile arduratsua. Hauxe da beraren funtsezko eginkizuna: edozein antzezlan egiten dugunok zerga-iruzurra leporatuta espetxean ez amaitzea! Zalantza bakarra dugu, hain lagun ona izanik, zer demontre egiten du negozio honetan?

Javi Area

Zuzendaritza artistikoa

Kortxeak eta kortxeaerdiak antolatzen ditu. Langile nekaezina da, eta lagun leiala ere bai. Erreferentziatzat hartzen dugun musikaria eta perkusionista da. Esaldirik gogokoena? «Ikastera, etxera!»

Odei Astibia

Banaketa

Zo-Zongó!! Bai, esan?? Bulegoko ahotsa… Metxa laburreko petardoa, kirolari amorratua, ur gezako marinela eta naturista konbentzitua… Zo-Zongó!! egitasmoaren fundatzailea da, eta inork baino gogo handiagoz defendatzen du. Pasio eta bihotz handikoa…